Innlit: búgarður í Santa Monica

Það ættu flestir að þekkja sjónvarpskonuna Ellen DeGeneres og eiginkonu hennar, leikkonuna Portia De Rossi. Þær eiga þennan fallega búgarð í Santa Monica í Los Angeles en Portia er mikil hestakona. Þetta er staður sem þær nota til að hlaða batteríin eftir annasama viku.

Þegar ég sá þær á forsíðu Elle Decor þá hélt ég að annar hver bloggari myndi pósta eða pinna þessum myndum og því hafði ég eiginlega ákveðið að láta þær eiga sig. Merkilegt nokk þá hafa afar fáir birt þær. Mér finnst þessi búgarður bara of skemmtilegur til að birta hann ekki. Þarna er látlaus og hrár stíll innan um 20. aldar húsgögn og muni af flóamörkuðum. Eggið hans Arne Jacobsen er að finna úti í hlöðu!

Stíllinn á öllu er ekki endilega minn en stofan á efstu myndinni er mitt uppáhaldsrými í húsinu; hönnunin á henni er mér að skapi. Það eru einhverjar myndir úr umfjölluninni sem ég sleppti og þið bara fylgið Elle Decor tenglinum neðst í færslunni til að skoða þær og myndatexta með nánari útskýringum.

myndir:
William Abranowicz fyrir Elle Decor

sólskáli í Gravenwezel kastalanum

Ég var með ákveðinn póst í huga fyrir daginn í dag en þegar ég rakst á myndina hér að ofan á netinu þá varð ég að deila henni. Þessi sólskáli tilheyrir Gravenwezel kastalanum sem er rétt fyrir utan Antwerpen, sem var jú okkar heimaborg í um tvö ár. Kastalinn er í eigu belgíska listmuna- og antíksalans Axel Vervoordt. Hann er með aðsetur í kastalanum og notar hann undir alls kyns sýningar og tvisvar sinnum á ári opnar hann dyrnar fyrir almenningi. Nú dauðsé ég eftir því að hafa ekki notað tækifærið til að kíkja þegar ég bjó í Antwerpen, en ég get bætt úr því síðar.

Þessi kastali er ævaforn. Það er ekki vitað hver byggði hann en ég hef séð heimildir sem vísa aftur til 13. aldar. Á 18. öld voru gerðar heilmiklar umbætur á kastalanum sem þá var í eigu fjölskyldu sem kallaðist Van Susteren. Það var einmitt þá sem sólskálinn var byggður.

Hér er mynd af sjálfum kastalanum og þið getið séð fleiri myndir með því að opna síðari tengilinn hér að neðan.

myndir:
1: Sebastian Schutyser af blogginu The Caledonian Mining Expedition Company / 2: Architecture and Interior Design

Uppskrift: hrísgrjón með indverskum kryddum

Það stóð nú til að pósta færslu í gær en ég kom heim seinna en ég ætlaði mér og eftir kvöldmat þá dúllaði ég mér við það að skrifa færslu á enska bloggið um myndina Julie & Julia (2009) sem Meryl Streep fór á kostum í sem matarkonan Julia Child. Svo þurfti jú að hjálpa börnunum með heimanám og slíkt þannig að kvöldið leið hratt. Ég var að horfa á þessa mynd, sem er ein af mínum uppáhalds, aftur um helgina og það varð eiginlega til þess að ég hugsaði bara enn þá meira um mat og uppskriftir. Það var nú alveg kominn tími á að deila nýrri uppskrift á matarbloggið þannig að ég bætti úr því áðan og skellti inn þessari sem ég kalla því einfalda nafni hrísgrjón með indverskum kryddum.

mynd:
Lísa Hjalt

rýmið 29

mynd:
Brent Darby fyrir Country Living UK, september 2012, stílisering: Ben Kendrick af Decorator's Notebook blog

sumarskyrtan

Það er búið að vera svo dásamlegt veður hérna hjá okkur að ég hef að mestu leyft tölvunni að vera í fríi. En nú er ég mætt út á verönd í nýju skyrtunni minni með ermarnar brettar upp og ætla að tala um sumarskyrtur.

Nýverið fór ég í leiðangur þar sem mig langaði að finna klassíska og tímalausa skyrtu til að nota þegar vorið léti sjá sig. Ég var búin að sjá margar hvítar en þar sem ég er með ljósa húð þá finnst mér þær ekki fara mér nógu vel, ekki nema að ég noti klút og í hitanum hér á sumrin er það ekki að gera sig. Ég endaði í Massimo Dutti þar sem ég mátaði þó nokkrar og féll kylliflöt fyrir þessari ljósbláu á myndinni hér að ofan. Hún er úr vorlínunni þeirra og er úr 100% líni. Allar skyrturnar sem ég mátaði hjá þeim voru úr náttúrulegum efnum, sem er mér að skapi. Ég hreinlega sé rautt þegar ég sé öll þessi gerviefni sem verið er að þröngva upp á neytendur í dag og passa því alltaf að skoða merkingarnar vel. Þessi skyrta er flott ein og sér eða óhneppt yfir til dæmis hvítan þunnan stuttermabol eða hlýrabol. Það sakar ekki að vera með flottan hatt líka.

Ef þið eruð í skyrtuleit þá læt ég fylgja nokkar myndir úr vorlínu DKNY, svona til að gefa ykkur hugmyndir. Auðvitað voru margir tískuhönnuðir sem sýndu fallegar skyrtur þegar þeir kynntu vorlínu sína en ég mundi sérstaklega eftir sýningu DKNY því Donna Karan paraði þær við alls kyns buxur og það sat í mér.

Á Pinterest er ég svo með alla vega þrjár skyrtur sem eiga heima í þessum pósti. Þessi hvíta skyrta er klassísk og bara sumarlegt að vera í öllu hvítu og brjóta upp með belti. Leikkonan Gwyneth Paltrow er hér í mjög smart svartri skyrtu við gallabuxur sem klikkar ekki ef verið er að fara út að kvöldi. Ein önnur skyrta sem ég væri til í að eiga í mínum fataskáp er þessi ljósröndótta sem Emmanuelle Alt, ritstjóri Vogue Paris, var mynduð í. Með svona flíkur í skápnum er maður gulltryggður og það má leika sér með endalausa möguleika.

myndir:
1: Lísa Hjalt / 2-7: Gianni Pucci + Yannis Vlamos af Vogue US

rýmið 28

Ég er búin að gera allt til að finna út í hvaða þýska tímariti þessi mynd birtist (eða mér finnst líklegt að það sé þýskt miðað við myndatextann) og hver tók hana en án árangurs. Þið sem hafið fylgst með bloggunum mínum vitið að ég greini alltaf nafn ljósmyndara og hvaðan myndir koma því ég hreinlega þoli það ekki þegar bloggarar pósta endalausum myndum án þess að geta heimilda. Í dag vil ég helst ekki birta myndir ef ég veit ekki hver tók þær en þetta svefnherbergi er hreinlega of fallegt til þess að pósta því ekki. Að hafa útsýni út í garðinn er náttúrlega bara dásamlegt, rétt eins og öll sú náttúrulega birta sem berst þarna inn.

mynd:
ljósmyndari óþekktur, af blogginu coco+kelley

innlit: vínekra í norðurhluta kaliforníu

Þetta innlit kemur úr nóvembertölublaði Architectural Digest frá árinu 2011 en blaðið heimsótti hjón sem eiga þetta fallega hús sem stendur á vínekru í Napa-dalnum í norðurhluta Kaliforníu. Arkitekt hússins var Bobby McAlpine. Ég valdi bara nokkrar myndir og ef þið viljið sjá restina þá fylgið þið tenglinum neðst í færslunni.

Nú er ég mikið fyrir hráan stíl og vil helst hafa viðarbita í loftum og breið gólfborð og náttúrulegar flísar á gólfum. Í þessu húsi er stíllinn hrár en um leið fágaður. Mér líkar lofthæðin og þessir gluggar og hurðir eru mér að skapi.

Eins og sjá má er eldhúsið ansi rúmgott (persónulega myndi ég kjósa eilítið hrárri stíl í eldhúsið) og birtan inni í því er dásamleg. Mér finnst smart að sjá opnar hillur með fallegum borðbúnaði.

Ein hurðin í eldhúsinu er máluð þannig að hún þjónar sem krítartafla og þarna má sjá tvo ömmu- og afastráka að dunda sér. Barnagestaherbergið á myndinni að ofan til hægri kallast Heiðukrókurinn, sem á vel við.

Útisturtan af hjónaherberginu þykir mér frábær og takið eftir arninum í herberginu. Mikið væri nú notalegt að vera með arinn í svefnherberginu þegar það er hvað kaldast úti ... og á baðherginu líka!

Eins og sjá má er húsið - þrjár byggingar sem tengjast - með stórkostlegu útsýni og landareignin er öll hin glæsilegasta. Þarna má svo sjá húsbóndann keyra með hundinn um vínekrurnar á Chevrolet pallbíl frá 1949.

myndir:
Roger Davies fyrir Architectural Digest, nóvember 2011

parís: notre dame kirkjan á île de la cité eyjunni

Myndunum sem ég tók í París í október í fyrra hef ég póstað samtímis á bloggunum og í dag geri ég enga undantekningu á því. Ég á enn eitthvað af myndum í skránum mínum og var ekki búin að ákveða hvort ég ætti að deila þeim eða ekki. Einhvern veginn var tíminn aldrei réttur. Í dag rigndi aðeins hér í Luxembourg og mér fannst eilítið dimmt yfir öllu og mundi þá eftir myndunum sem ég tók af Notre Dame kirkjunni.

Því er ekki að neita að gotneskur arkitektúr kirkjunnar er stórfenglegur en fyrir mér eru sumir hlutar hennar myrkir, allt að því hrollvekjandi. Hafið þið lesið Hringjarinn í Notre Dame eftir Victor Hugo? Sæmilegt myrkur í henni! (Skáldsagan er ekkert í líkingu við Disney teiknimyndina, bara svo það sé á hreinu!)

Síðustu myndina tók ég þegar ég stóð á Place du Parvis Notre-Dame og horfði inn í Rue du Cloître Notre Dame. Það er alveg sama hvar maður er í París, það er alltaf einhver úti að ganga með hundinn sinn, einhver með blóm í fanginu eða ferðalangar með kort og myndavél. Jafnvel bæði.

myndir:
Lísa Hjalt
- myndir teknar í október 2012

augnablikið 01

Á ensku útgáfu bloggins pósta ég einstaka sinnum færslum sem ég kalla Drawing with light og þær innihalda bara eina ljósmynd sem á einhvern hátt höfðar til mín. Myndefnið getur verið úr náttúrunni, ferðalög, tíska eða hvað sem er. Ég hef stundum velt því fyrir mér að vera með eins seríu hér og þessi fallega mynd sem ég fann í gær ýtti við mér. Hún er tilvalin byrjun á seríu sem ég ætla að kalla Augnablikið.

Vonandi byrjar vikan ykkar vel!

mynd:
Massimo Dutti, auglýsingaherferð vor/sumar 2013

Rýmið 27

Rými dagsins er ekki beint alvöru rými heldur stílisering fyrir franska fyrirtækið Becquet sem sérhæfir sig í hvers kyns vefnaðarvöru fyrir heimilið. Mér finnst gaman að raða saman litum með þessum hætti þar sem ég fékk á einhverjum punkti leið á rúmfötum með mynstri. Fyrir töluverðu síðan sá ég svo falleg rúmföt í bleiku úr bómull en liturinn var töluvert ljósari en þessi á myndinni. Þegar ég fór aftur á stjá til að kaupa þau þá voru þau búin - týpískt. Ég keypti tvo aðra liti í staðinn, kremaðan og grábrúnan, og bætti svo við hvítum koddaverum og þessi blanda af litum kemur svo vel út.

Ég þarf fljótlega að fara aftur á stjá því núna fer að líða að því að við tökum sumarsængurnar í notkun og þær eru eilítið breiðari. Ég á falleg ljósgrá ver á þær og langar að bæta við öðrum lit til að brjóta þetta aðeins upp eins og ég gerði í vetur.

mynd:
af síðunni Maison & Déco